Takeaway Proxecto DAW – IES Chan do Monte Autor: José Benito Méndez Padín

ÍNDICE DE CONTIDOS

1. – Introdución
2. – Estudo empresarial 2.1 – Obectivos 2.1.1 – Que queremos satisfacer? 2.1.2 – Como o imos facer? 2.1.3 – A quen nos diriximos? 2.2 – Motivación e xustifiación da idea 2.3 – Análise do microentorno: cinco forzas de Porter 2.3.1 – Ameaza de novos competidores 2.3.2 – Ameaza de produtos substitutivos 2.3.3 – Análise da competencia 2.4 – Análise DAFO 2.5 – Análise CAME 2.6 – Forma xurídica 2.7 – Plan de márketing 2.7.1 – Público obxectivo e segmentación 2.7.2 – Produto / Servizo 2.7.3 – Prezo 2.7.4 – Comunicación 2.8 – Custos iniciais, periódicos e financiación 2.9 – Fontes de ingresos
3. – Estudo técnico 3.1 – Tecnoloxías escollidas e xustificación 3.2 – Funcionamento xeral 3.3 – Modelo de dominio
4. – Conclusións

1. Introdución

Este proxecto consiste no desenvolvemento dunha aplicación dirixida ó sector hostaleiro do mercado.

A aplicación está orientada a ser utilizada como un servizo web, polo que os seus clientes non deberán instalar nada nos seus ordenadores. Só necesitan ter un ordenador con conexión a internet e un navegador instalado.

2. Estudo empresarial

2.1 Obxectivos

Partimos aquí, antes de nada, de dar resposta a tres preguntas básicas que nos axudarán máis tarde a desenvolver mellor o plan estratéxico.

2.1.1 Que queremos satisfacer?

O obxectivo principal é utilizar a aplicación para dinamizar o mercado actual e ofrecer ó sector hostaleiro unha alternativa máis para poder chegar a un maior número de clientes ofrecendo novos servizos, como é o de pedir a distancia e servir a comida a domicilio. Na situación actual, é un mercado cunha ampla posibilidade de crecemento. Polo tanto, queremos servir de intermediarios entre os negocios hostaleiros e os seus clientes para que poida haber un mellor fluxo de comunicación / negocio entre eles.

2.1.2 Como o imos facer?

Imos crear unha aplicación web (id est, aloxada nun servidor e accesible a través dun navegador web) na que os negocios hostaleiros se poidan rexistrar e poidan ofrecer os seus productos dunha forma rápida e directa ós seus posibles clientes, quen poderán solicitar estes produtos, xa sexa para que llos envíen ó seu domicilio ou para ir recollelos ó local do negocio.

2.1.3 A quen nos diriximos?

En primeiro lugar, dirixímonos ós negocios hostaleiros que na situación actual están vendo disminuír os seus ingresos. Pero tamén nos diriximos ás persoas en xeral para que, a través da nosa aplicación, poidan pedir comida a domicilio de forma rápida e sinxela.

2.2 Motivación e xustificación da idea

A idea xorde tralo análise da situación socio económica actual, derivada da expansión pandémica da covid-19. Moitas empresas están vendo reducidos os seus ingresos debido a medidas gobernamentais como as limitacións de horario de apertura dos negocios, o peche temporal destes ou o confinamento da poboación que, mentres intentan disminuír o impacto da enfermidade na sociedade e a frear a súa expansión, impiden que se manteña o nivel de movemento económico que se viña dando ata ese momento. En conclusión, dadas as condicións actuais, é previsible que un proxecto así gozará dunha ampla aceptación e permitirá a súa solvencia económica.

2.3 Análise do microentorno: cinco forzas de Porter

O modelo das cinco forzas de Porter establece un marco para analizar a competencia dentro dunha industria, de xeito que se poida desenvolver unha estratexia de negocio. Estas cinco forzas operan no entorno inmediato dunha organización, e afectan á habilidade desta para satisfacer ós seus clientes e obter rendibilidade.

2.3.1 Ameaza de novos competidores

Este punto refírese ás barreiras de entrada existentes no sector. Canto máis fácil sexa entrar, maior será a ameaza.

Requirimentos de capital: Lanzar un negocio deste tipo non require, inicialmente, dun excesivo capital inical. Basicamente precisarase do capital necesario para mercar un para de ordenadores para realizar o traballo. En canto ós empregados, nun principio será suficiente, mentres non medre o negocio, de como máximo catro persoas: dous programadores, unha persoa para atención ó cliente e outra para márketing.

Diferenciación do produto: É importante que o cliente final distinga o noso negicio do da competencia. Para iso, debemos facernos ver cunha campaña de márketing inicial e estar ben presente na rede, xa sexa a través das redes sociais, a través de anuncios, etc.

Identidade de marca: Nun primeiro momento, debido a que pode existir unha forte competencia por parte de marcas que xa levan algún tempo operando no mercado, debemos crear unha identidade de marca forte, que nos diferencia das outras nalgún punto. Debemos ofrecer, por exemplo, unha imaxe de seriedade e fiabilidade, pero tamén, e sobre todo, de respecto polas condicións laborais dos nosos traballadores (bo ambiente de traballo, vacacións, ascensos, etc.) e de compromiso co medio ambiente.

Custos de cambio: Debemos estudar os custos que os nosos posibles clientes teñen cando se relacionan con empresas competidoras para, deste xeito, poder ofrecerlles unha alternativa mellor. Por exemplo, canto lles custa estar rexistrados con outro negocio de comida a domicilio.

Localización: A localización no noso caso non é realmente importante, xa que a comunicación co cliente farase a través de canles de telecomunicación. Polo tanto, podería ser irrelevante a existencia dunha oficina ou, no caso de existir, a súa localización non suporía un problema.

Curva da experiencia: Está claro que canto máis tempo leve unha empresa funcionando, máis experiencia vai ter e mellor poderá solventar as posibles dificultades que aparezan. Nun primeiro momento non gozaremos da suficiente experiencia, pero poderá solucionarse cunha previa preparación e estudo do entorno.

2.3.2 Ameaza de produtos substitutivos

Visto que as ameazas de novos competidores son posibles debido, sobre todo, ó reducido custo de entrar no sector, existe tamén a ameaza de produtos substitutivos, é dicir, de que os clientes se decanten por outro competidor. Por iso é importante conseguir diferenciarnos.

2.3.3 Análise da competencia

Neste ámbito de negocio, como xa comentamos, existen empresas que xa levan tempo operando, polo que podería pensarse que vai ser un mercado competitivo. Pero tamén temos que ter en conta o crecemento de dito mercado, sobre todo relacionado coa situación sanitaria e económica actual. Os cambios que se introduzan agora (aumento das opcións de compra a distancia e entrega no domicilio) van quedar instalados na sociedade, polo que o sector vai medrar a bo ritmo e haberá sitio para máis competidores. Algunhas empresas da competencia poden ser JustEat, Deliveroo, UberEats, Glovo

Empresa	Actividade e marca
JustEat	Amplo catálogo Interface sinxela Pago efectivo / tarxeta / PayPal Taxa de apertura 450 € Comisión 30 % + IVA por envío
Deliveroo	Interface coidadaServizo de máis calidadeTaxa de apertura de 324 € + IVAComisión do 35 % + IVA por envío
UberEats	Pago con tarxeta sóComisión do 30 % + IVA + 0.20 € por envío
Glovo	Servizo de mensaxería (recoller e entregar)Taxa de apertura de 150 € + IVAComisión do 40 % + IVA
Vemos que existe unha forte competencia, con marcas moi coñecidas, pero que é posible competir con elas se conseguimos crear unha forte imaxe de marca.

2.4 Análise DAFO

2.4.1 Análise interna: Debilidades:

• Unha desvantaxe pode ser a falta de financiación inicial para unha necesaria campaña de márketing a gran escala. Polo tanto, a carteira de clientes inicial será pequena.
• Escasa experiencia no sector.
• Imaxe de marca pouco coñecida.

Fortalezas:

• Inicial necesidade de recursos humanos, que pode ser cuberta con facilidade.
• Escaso custo en canto a produción que a empresa debería afrontar, xa que non se precisa dun gran aporte de capital para realizar o traballo básico necesario.
• Facilidade de facerse ver en internet, ó ser unha empresa dixital.

2.4.2 Análise externa: Ameazas:

• Unha posible ameaza é a presenza de competidores fortes, que chegaron con anterioridade ó mercado, como pode ser o caso de Just Eat.
• Facilidade de entrada no sector debido ós baixos custos de posibles competidores.

Oportunidades:

• Unha oportunidade atópase na situación actual, marcada pola necesidade das empresas de facerse visibles en internet e chegar aos seus clientes por novos métodos.
• Sector en crecemento.

2.5 Análise CAME

A partir dos datos analizados a través do DAFO, que á súa vez parten da análise do entorno, podemos facer unha análise CAME.

Corrixir as debilidades:

• Buscarase unha posible financiación inicial, non moi elevada, para unha campaña de márketing que nos dea a coñecer e así poder chegar a máis público. Sobre todo, intentarase ter unha boa posición nos buscadores web, para o que se traballará o SEO. Para isto non é necesario contar con financiación, xa que se fará dende a propia empresa.

Afrontar ameazas:

• Trataremos de difrenciarnos dos competidores ofrecendo unha mellor visión da marca.

Manter as fortalezas:

• Potenciaremos a presenza en buscadores web, mellorando o posicionamento SEO.

Explotar oportunidades:

• Ofreceremos boas condicións ás empresas que utilicen os nosos servizos para que se unan a nós e non a un posible competidor.

2.6 Forma xurídica

A forma xurídica elixida será a de Sociedade Limitada Nova Empresa, que é unha especialidade da Sociedade Limitada. Esta forma xurídica contempla un mínimo de un socio e un máximo de cinco, ademais de necesitar só 3.000 € como capital inicial e ter unha responsabilidade limitada ó capital aportado na sociedade. Polo tanto, axústase perfectamente á idea de negocio.

A denominación social será o nome e os apelidos dun dos socios fundadores, ademais dun código alfanumérico (ID-CIRCE), seguido das palabras "Sociedade Limitada Nova Empresa" ou a abreviación "SLNE". Esta denominación social solicitarase a través de CIRCE (Centro de Información e Rede de Creación de Empresas). Unha vez que se constitúa a sociedade, poderase cambiar a denominación da mesma de xeito gratuíto e poderase elixir unha obxectiva (de fantasía) ou subxectiva.

Os órganos sociais da sociedade serán unha Xunta Xeral de socios e un Órgano de administración unipersoal ou pluripersoal.

En conclusión, a forma xurídica será a de Sociedade Limitada Nova Empresa unipersoal, cun capital inicial de 3.000 €. A tributación será sobre o Imposto de Sociedades. As vantaxes que nos fan decantarnos por esta forma xurídica son:

• limitación da responsabilidade económica dos socios
• liberdade de denominación social
• capital social mínimo moi reducido
• posibilidade de aportar o capital en bens ou diñeiro
• non é necesaria a valoración das aportacións non diñeirais por un experto independente. Así como tampouco a súa intervención ou a dun auditor en ampliacións de capital
• vantaxes fiscais con respecto a outras formas xurídicas

Os trámites necesarios son os seguintes: Trámites xerais:

• Alta no censo de empresarios, profesionais e retedores da Axencia Tributaria
• Imposto sobre actividades económicas da Axencia Tributaria. As empresas de nova creación estarán exentas durante os dous primeiros exercicios
• Alta dos socios e administradores nos réximes da Seguridade Social: Tesourería Xeral da Seguridade Social
• Legalización do Libro de actas, do Libro de rexistro de socios, do Libro-rexistro de accións nominativas e do Libro rexistro de contratos entre o socio único e a sociedade: Rexistro Mercantil Provincial
• Legalización do Libro Diario e do Libro de Inventarios e Contas Anuais: Rexistro Mercantil Provincial
• Obtención dun certificado electrónico: Autoridades de certificación

Trámites segundo a actividade:

• Licencia de actividade: Concello

Trámites en caso de contratar traballadores:

• Inscrición da empresa na Tesourería Xeral da Seguridade Social
• Afiliación de traballadores (en caso de que non o estean xa) na Tesourería Xeral da Seguridade Social
• Alta dos traballadores no Réxime da Seguridade Social na Tesourería Xeral da Seguridade Social
• Alta dos contratos de traballo no Servizo Público de Emprego Estatal
• Obtención do calendario laboral na Inspección Provincial de Traballo

Trámites complementarios:

• Rexistro de signos distintivos na Oficina Española de Patentes e Marcas

2.7 Plan de márketing

2.7.1 Público obxectivo e segmentación Aquí temos dous enfoques distintos, posto que queremos chegar a dous tipos distintos de público. Por un lado, queremos chegar ás empresas de hostalaría para que contraten os nosos servizos. Polo outro, precisamos chegar a un público máis amplo, dende adolescentes ata persoas adultas para que utilicen a nosa aplicación como a ferramenta principal para pedir comida.

Con respecto a este último grupo obxectivo, interésanos que nos vexa a maior cantidade posible de xente, non atendendo a segmentacións de clase social, xa que en xeral todos poden facer uso deste tipo de servizos. E máis na situación actual de crise sanitaria, na que existe certa inseguridade á hora de saír a comer fóra do domicilio.

2.7.2 Produto / Servizo O noso servizo consiste en servir de intermediario entre o cliente final e un comercio hostaleiro. Polo tanto, ofrecemos ó cliente final unha forma sinxela e rápida de pedir comida (a domicilio ou para recoller) e, por outro lado, ofrecemos ós negocios de hostalaría a posibilidade de chegar a máis público ó ofrecer os seus produtos con nós.

2.7.3 Prezo Analizando os prezos que manexa a competencia no sector, podemos ofrecer un servizo con prezos algo máis axustados e máis beneficiosos para os nosos clientes. A continuación mostramos unha táboa cos prezos que utilizaremos nun primeiro momento, podendo actualizalos conforme vaia pasando o tempo.

2.7.4 Comunicación A comunicación vai ser imprescindible para chegar ó noso público obxectivo e conseguir ser unha opción elixible dentro do sector A presenza en redes sociais é fundamental, xa que gran parte de poboación participa dalgunha forma, xa sexa activa ou pasiva, nalgunha rede social. Máis da metade da poboación mundial ten algunha rede social. Facebook, Twitter e Instagram son as principais, as que contan con máis usuarios e, polo tanto, ofrecen a posibilidade de chegar a máis xente.

2.8 Custos iniciais, periódicos e financiación

Os custos iniciais compóñense de:

• gasto en equipo informático: aproximadamente 3.500 €
• capital social: 3.000 €
• gastos de notaría: aproximadamente 300 €
• inscrición rexistro mercantil: 100 €
• outros gastos de rexistro da empresa: 50 € Total gastos fixos: 6950 €

Dentro dos custos periódicos podemos incluír:

• gastos de asesoría e xestoría: 150 € / mes
• márketing: aproximadamente 2.400 € / ano
• pago de subministros: aproximadamente 1.500 € / ano
• salarios: aproximadamente 5.800 € / mes
• servidores: aproximadamente 100 € / mes
• devolución préstamo: 583 € / mes Total gastos periódicos: 95.096 €

En canto á financiación, contamos con:

• financiación propia: 15.000 €
• préstamo: 50.000 € a devolver en 10 anos (4 % de interese)

Polo tanto, contando coa financiación propia, o préstamo bancario e máis os beneficios da actividade económica, poderiamos difrenciar dous escenarios de financiación anual:

• Escenario medio: 15.000 + 50.000 + 61.200 = 126.200 €

• Escenario óptimo: 15.000 + 50.000 + 90.000 = 155.000 €

Balance:

• Primeiro ano:

  • Beneficios: 126.200 €
  • Gastos: 102.046 €
  • Balance: +24.154 €

• Segundo ano:

  • Beneficios: 127.440 €
  • Gastos: 88.100 €
  • Balance: +39.340 €

2.9 Fontes de ingresos

Como fontes de ingreso principais temos os cobros por rexistro de empresas na aplicación e as comisións por pedido. Partiremos da base dunha implantación a nivel territorial. En Galicia existen algo máis de trescentos concellos, polo que tomaremos como base que se rexistra na aplicación unha empresa por cada dous concellos. Deste modo, teremos, mínimo, cento cincuenta empresas rexistradas. A nosa expectativa é un ritmo de rexistro de dez empresas ó mes. Así, definiremos tres posibles escenarios de funcionamento da nosa empresa, dende un escenario óptimo, no que as cifras alcanzadas en canto a volume de negocio son altas, ata un escenario desfavorable, no que as cifras do volume de negocio non son moi favorables.

• Escenario desfavorable: | Pedidos por empresa / mes | 10 | | Prezo medio pedido | 15 € | | Comisión por pedido | 3 € | | Cantidade de empresas (media) | 60 | | Prezo alta aplicación | 60 € | | Total anual | 25.200 € |

• Escenario medio: | Pedidos por empresa / mes | 20 | | Prezo medio pedido | 20 € | | Comisión por pedido | 4 € | | Cantidade de empresas (media) | 60 | | Prezo alta aplicación | 60 € | | Total anual | 61.200 € |

• Escenario óptimo: | Pedidos por empresa / mes | 30 | | Prezo medio pedido | 20 € | | Comisión por pedido | 4 € | | Cantidade de empresas (media) | 60 | | Prezo alta aplicación | 60 € | | Total anual | 90.000 € |

Ingresos segundo ano:

• Escenario medio: | Pedidos por empresa / mes | 20 | | Prezo medio pedido | 20 € | | Comisión por pedido | 4 € | | Rexistro novas empresas | 12 (10 % máis que ano anterior) | | Cantidade de empresas (media) | 60 | | Prezo alta aplicación | 60 € | | Total anual | 127.440 € |

Vemos que, no peor dos casos, cunhas malas cifras de negocio, o beneficio anual só desas dúas variables sería de 25.200€. Pero se tomamos como referencia un escenario medio, o valor dos ingresos serían de aproximadamente 46.800 €. Aínda así hai que ter en conta que son cifras estimativas moi baixas. O normal é que tanto o prezo medio do pedido como o número de pedidos sexa superior, así como tameń o número de empresas rexistradas, polo que a marxe de beneficios aumentaría. Así, nunha estamación medianamente optimista, os beneficios anuais ascenderían a aproximadamente 90.000 €.

3. Estudo técnico

3.1 Tecnoloxías escollidas e xustificación

Esta aplicación dará servizo a dous tipos de usuarios distintos:

• Usuarios anónimos: Son os clientes finais, que poden acceder á plataforma para facer os seus pedidos de comida de entre as opcións que poñan á súa disposición os administradores dos restaurantes rexistrados.

• Administradores de restaurantes: Poderán rexitrarse na aplicación e engadir as súas empresas xunto cos seus produtos. Terán a capacidade de engadir categorías e produtos propios.

As tecnoloxías que se utilizan son todas libres e de código aberto, polo que non existirá un sobrecusto neste aspecto en termos de licenzas. Para o desenvolvemento da aplicación utilízase a linguaxe de programación Python (versión 3.7) a través do framework Django (versión 3.1). En canto á base de datos, utilízase SQLite. É software de dominio público.

3.2 Funcionamento xeral

• Usuarios anónimos: Nada máis entrar na páxina principal da apliación, terán á súa disposición unha serie de restaurantes nos que entrar para ver os produtos que ofrecen e engadilos ó seu carriño da compra para facer o pedido. Ó entrar nun restaurante, poden seleccionar os produtos, que se irán engadindo ó carriño. Unha vez rematado, poderán proceder a ver o pedido, pulsando no botón de ‘pagar’ e, a continuación, poderán pagar o seu pedido despois de indicar a súa dirección.

• Usuarios administradores: Para rexistrar o seu negocio, terán un enlace na páxina principal (Restaurante: Únete) no que introducirán un email de contacto e recibirán unha ligazón. Unha vez que fagan click nesa ligazón, poderán rexistrarse como usuarios na aplicación. A continuación, poderán loguearse. Unha vez logueados, terán á súa disposición un apartado para administrar o seu negocio. A primeira vez que entren terán que engadir o seu restaurante. Unha vez que este sexa creado, poderán ir engandindo categorías e, dentro de cada categoría, os produtos que desexen. Poderán crear, ver, modificar ou eliminar tanto as categorías como os produtos.

3.3 Modelo de dominio

4. Conclusións

Recapitulando as conclusións das análises realizadas ata agora, entendemos que o proxecto conta co beneficio do tempo no que xorde, no que o comercio a través de internet está en gran aumento. En canto ós traballadores da empresa, nun primeiro momento contaremos con tres traballadores, un dos cales será o socio creador da sociedade limitada, polo que os gastos de pagar salarios anuais pode verse reducido, ampliando positivamente o balance da empresa. En definitiva, podemos dicir que, despois de revisar tódalas análises anteriores, o proxecto é viable en tódolos aspectos. Pero, sobre todo, é viable no aspecto máis importante, o económico, pois xa dende o primeiro exercicio se espera ter un balance positivo.